Kuvendi ratifikon kredinë 60 milionë euro për kampusin e studentëve në kuadër të “Prishtina 2030”

Me 95 vota për, asnjë kundër e asnjë abstenim, Kuvendi i Kosovës ratifikoi të hënën marrëveshjen ndërmjet Republikës së Kosovës dhe Agjencisë Franceze për Zhvillim, që parasheh një kredi prej 60 milionë eurosh për renovimin dhe zgjerimin e kampusit të studentëve të Universitetit të Prishtinës, siç njofton KosovaPress.

Projekti, i prezantuar në Kuvend nga ministri në detyrë i Financave, Hekuran Murati, synon të rinovojë dhe zgjerojë infrastrukturën e kampusit të studentëve — pjesa te konviktet — si dhe të rinovojë dhe ndërtojë objekte sportive në institucione të ndryshme arsimore përreth hapësirës së konvikteve.

Sipas Muratit, projekti mbështet organizimin e Lojërave Mesdhetare “Prishtina 2030”: gjatë lojërave, kampusi i studentëve do të shërbejë përkohësisht si fshati i atletëve, ndërsa objektet sportive të shkollave përreth do të përdoren si qendra stërvitore për atletët.

Sa i përket strukturës së financimit, përveç kredisë 60 milionë eurosh ekziston mundësia e përfitimit edhe të një granti shtesë investiv prej 10 milionë eurosh të tjera, bëri të ditur Murati.

Përtej Lojërave Mesdhetare, projekti është i dizajnuar për të vendosur një trashëgimi të qëndrueshme për studentët e Universitetit të Prishtinës dhe banorët e qytetit, sipas raportimit të KosovaPress.