Lavrov sot në Teheran: Moska do të paraqesë hapat për uljen e tensioneve, pritet nga presidenti Pezeshkian

Ministri i Jashtëm i Rusisë, Sergey Lavrov, do të paraqesë këtë të hënë në Teheran hapat që Moska po ndërmerr për uljen e tensioneve rajonale të krijuara nga lufta e Shteteve të Bashkuara dhe Izraelit kundër Iranit, siç njofton Al Jazeera, duke cituar agjencinë ruse TASS.

Sipas raportimit, Lavrov do të pritet nga presidenti i Iranit, Masoud Pezeshkian, dhe do të zhvillojë bisedime me ministrin e Jashtëm iranian, Abbas Araghchi. Ai pritet t’i informojë zyrtarët iranianë edhe për takimet e tij me përfaqësues të vendeve anëtare të Këshillit të Bashkëpunimit të Gjirit në Manama të Bahreinit.

Vizita ishte paralajmëruar më 17 tetor nga zëdhënësja e Ministrisë së Jashtme ruse, Maria Zakharova, e cila tha se Lavrov do të zhvillonte një vizitë pune në Teheran dhe se në qendër të bisedimeve do të ishin situata rreth Iranit dhe hapat e Rusisë drejt uljes së tensioneve në Azinë Perëndimore.

Vizita e Lavrov-it vjen në muajin e tetë të luftës SHBA–Iran, ndërsa sulmet ndaj anijeve në Ngushticën e Hormuzit vazhdojnë: organizata britanike UKMTO ka raportuar 12 sulme brenda një jave në Hormuz, në Gjirin Persik dhe në Gjirin e Omanit.