Ligji i mbetjeve, Meta: Do ketë dialog
Ligji për mbetjet ka mbledhur bashkë shoqërinë civile dhe kryeparlamentarin Ilir Meta në një takim. Biseda e zhvilluar në ambientet e Kryesisë së Kuvendit ka zgjatur plot 60 minuta.
Pjesë e këtij takimi kanë qenë Unioni i Ekspertëve mjedisorë, juristë, si dhe përfaqësues të mediave.
Ambientalisti Sazan Guri është shprehur se rruga e dekretit për mbetjet është drejt rrugës së duhur.
Ndërsa, Zheji në përfundim të takimit tha se “Kreu i Kuvendit, Ilir Meta na la të kuptojmë se pa konsensus nuk ka ligj”.
“I vetmi konsensus është vota kundër ‘mbetjeve’”, është shprehur Zheji drejtuar Metës.
Sakaq, kryetari i Kuvendit, Meta vlerësoi angazhimin e tyre për këtë çështje të ndjeshme duke nënvizuar se ai do të dëshironte që miratimi i një ligji të tillë të mund të shteronte të gjitha mundësitë e dialogut, mirëkuptimit dhe konsensusit me shoqërinë civile, përfaqësuesit e industrisë ricikluese dhe opinionin publik, me qëllim që ligji t’i shërbejë interesit të qytetarëve, imazhit të Shqipërisë, rritjes ekonomike të vendit, zhvillimit të turizmit, bujqësisë dhe të rrisë punësimin e të ndikojë pozitivisht në mbrojtjen e mjedisit dhe shëndetin e jetës së qytetarëve.
Ndërkohë, më 14 tetor presidenti Bujar Nishani kthehu në parlament ligjin për menaxhimin e mbetjeve. “Ligji i mbetjeve bie ndesh me nenin 59 të Kushtetutës, – theksoi Nishani, ndërsa shtoi se: “Shqipëria nuk ka asnjë detyrim të importojë mbetje. Procedurat për miratimin ishin të përshpejtuara dhe po ashtu është shkelur neni 56 i Kushtetues për mos informim të qytetarëve”.
