Lista Studentore sot dorëzon ankesën në RIK për vendvotimet në dijasporë, në 18:00 tubimi “Neće moći ove noći”

Lista zgjedhore “Studentska lista – Studenti pobeđuju” njoftoi për sot në orën 18:00 tubimin “Neće moći ove noći” (“Nuk do të mundeni sonte”) para Komisionit Republikan të Zgjedhjeve (RIK) në Beograd, ku përfaqësues të saj do të dorëzojnë ankesën kundër vendimit të RIK-ut për caktimin e vendvotimeve jashtë vendit, siç njofton Nova.rs.

“Për shkak të vendimit të turpshëm të RIK-ut për caktimin e vendvotimeve jashtë vendit, si dhe vendimit që votimi në të gjitha qytetet të organizohet sipas orës serbe, me çka shkelet rëndë ligji dhe rrezikohet drejtpërdrejt e drejta e votës e qytetarëve tanë jashtë vendit, mblidhemi për të dorëzuar ankesën dhe për të treguar nevojën e mbrojtjes së vullnetit zgjedhor të qytetarëve”, thuhet në deklaratën e listës, sipas Nova.rs.

Tubimi do të mbahet para selisë së RIK-ut në rrugën Kralja Milana, në ndërtesën e Kuvendit Popullor, ku përfaqësuesit e Listës Studentore do t’u drejtohen të pranishmëve me detajet e ankesës.

Vendimi i RIK-ut u votua më 4 tetor pas mesnate: komisioni miratoi propozimin e Ministrisë së Punëve të Jashtme për vendvotimet jashtë vendit, një propozim që u kritikua ashpër nga disa anëtarë të komisionit. Kryetari i RIK-ut, Vladimir Dimitrijević, deklaroi se në zgjedhjet e kaluara kishte 81 vendvotime jashtë vendit, ndërsa propozimi i MPJ-së parashikon 93, raporton Nova.rs.

Ndërkohë, anëtari i RIK-ut nga Lista Studentore, David Krstić, tha të hënën se rreth 10.000 votues në 12 shtete preken drejtpërdrejt nga ky vendim dhe nuk dihet ku do të votojnë, ndaj dorëzimi i ankesës sot shihet si hapi i radhës në betejën e studentëve për mbrojtjen e votës së dijasporës.