LSDM: Mickoski kundër bujqve, sërish e shpëtoi Tripunovskin nga përgjegjësia

Nga partia maqedonase në opozitë LSDM, thonë se Hristijan Mickoski edhe një herë u ngrit kundër fermerëve dhe e shpëtoi ministrin e tij Cvetan Tripunovski.

Nga LSDM thonë se me urdhër të drejtpërdrejtë të Mickoskit, deputetët e OBRM-PDUKM-së dhe shumica qeverisëse në Parlament votuan kundër interpelancës për Tripunovskin.

“Me këtë, Mickoski edhe një herë u ngrit kundër mijëra fermerëve në të gjithë vendin të cilët kërkuan me zë të lartë dorëheqjen e ministrit më të paaftë në histori. Tani është e qartë për të gjithë fermerët se Hristijan Mickoski qëndron pas situatës katastrofike në bujqësi, subvencioneve të reduktuara, subvencioneve të papaguara dhe skandaleve të korrupsionit”.

“Vetëm në 2 vjet, bujqësia është në gjunjë, fermerët mezi mbijetojnë. Subvencionet janë ulur deri në 40 milionë euro dhe nuk po paguhen, mbështetja për duhanin është ulur nga 100 në 80 denarë për klasën e parë, një sërë masash për fermerët e vegjël, vreshtarit, prodhuesit e orizit janë hequr, subvencionet për bagëtinë janë ulur nga 12,000 denarë në vetëm 8,000 denarë”.

“Blegtoria është sjellë në prag të kolapsit, numri i krerëve po zvogëlohet, dhe fermerët e bagëtive ankohen çdo ditë për çmimet e ulura të blerjes së qumështit. Në një kohë kur çmimet në tregje po rriten, çmimi i blerjes së qumështit po ulet. Ku mbaron pra ndryshimi? Çmimet e blerjes janë poshtëruese, dhe kostot e prodhimit po rriten vazhdimisht. Vreshtarit, kultivuesit e frutave, kultivuesit e duhanit dhe kopshtarët kanë mbetur pa asnjë mbështetje”, thonë nga LSDM.