Lufta kundër korrupsionit, së shpejti memorandum bashkëpunimi me Italinë
Ministria e Drejtësisë dhe Zyra e Antikorrupsionit Italian do të nënshkruajnë së shpejti një memorandum bashkëpunimi në fushën e drejtësisë dhe luftën ndaj korrupsionit.
Lajmi u bë i ditur në përfundim të takimit të zhvilluar në Tiranë mes Kreut të Antikorrupsionit në Ital, Raffaele Cantone dhe Ministres së Drejtësisë, Etilda Gjonaj.
Gjatë një prononcimi për mediat, Ministrja e Drejtësisë, Etilda Gjonaj u shpreh se gjatë takimit ndër të tjera u diskutua mbi thellimin e bashkëpunimit mes Antimafies Italiane dhe sistemit gjyqsor në vendin tonë.
Sipas Gjonajt, është diskutuar për shkëmbim eksperiencash mes palëve, veçanërisht në çështjet që lidhen me korrupsionin. Po ashtu dhe për mekanizmat e bashkëpunimit mes palëve.
“Lufta korrupsionit, thellimi i bashkëpunimit në fushën e drejtësisë, veçanërisht në çështjet që lidhen me sistemin gjyqësorë ishin në fokus të takimit. Ministria e Drejtësisë është në kontakt të vazhdueshëm me palën italiane, bashkëpunimi është i shëndetshëm. Janë një sërë objektivash për t’u arritur. Ministria e Drejtësisë po shqyrton metodologjinë e planit të veprimit 2018-2020 për mënyrën e luftës kundër këtij fenomeni. Jemi në fazën e zbatimit të Reformës në Drejtësi dhe pritet të ngrihen institucionet e reja të cilat pritet t’i shërbejnë luftës kundër korrupsionit”, tha Gjonaj.
Nga ana e tij, kreu i agjencisë italiane të antikorrupsionit, Raffaele Cantone tha se Shqipëria ka bërë hapa pozitivë vitet e fundit në drejtim të luftës kundër korrupsionit. “Shqipëria po bën hapa pozitivë nga ana legjislative. Italia do ndihmojë Shqipërinë në luftën kundër korrupsionit. Duhen krijuar mekanizma koordinimi nga autoritetet e krijuara për të luftuar korrupsionin”, tha Cantone.
Duke iu përgjigjur interest të gazetarëve, Ministrja Gjonaj tha se dikasteri që ajo drejton është duke vlerësuar dhe mundësinë e Vettingut për policinë e burgjeve.
