Lunaçek: MSA-ja , hap i rëndësishëm në rrugën e Kosovës drejt BE-së
“Marrëveshja për Stabilizim-Asociimin është një moment historik në marrëdhëniet e Kosovës me BE-në dhe zhvillimin e saj si një shtet evropian”, theksoi sot nënkryetarja e Parlamentit Evropian dhe njëkohësisht Raportuesja për Kosovën në Parlamentin Evropian, Ulrike Lunaçek.
Duke folur gjatë seancës së sotme, ku edhe u votua MSA mes Kosovës dhe BE-së, Lunaçek tha se “Parlamenti Evropian ka dhënë sot dritën e gjelbër për marrëveshjen e BE-së me Kosovën. Për herë të parë, BE-ja dhe Kosova do të vendosin marrëdhënie kontraktuale, e që është një tjetër hap i rëndësishëm në rrugën e Kosovës drejt integrimit në BE. Një shumicë votash në favor të kësaj marrëveshje jep një sinjal të rëndësishëm e pozitiv për qytetarët dhe ekonominë e Kosovës. Zbatimi i marrëveshjes do të ndihmojë institucionalizimin e procesit të reformave”.
Sipas Lunaçek, hapi i ardhshëm duhet të jetë liberalizimi i vizave për qytetarët e Kosovës.
“Të dyja, MSA-ja dhe shpresojmë se së shpejti udhëtimi pa viza, do të sjellin mundësi të reja për Kosovën që të forcojë marrëdhëniet me BE-në dhe në këtë mënyrë të kontribuojë në stabilizimin e të gjithë rajonit”, tha Lunaçek.
