Mamdani: 1,000 bileta me vlerë 50 dollarë në dispozicion të njujorkezëve për ndeshjet e Kupës së Botës

Disa banorë të Nju Jorkut së shpejti do të kenë mundësinë të sigurojnë bileta të lira për Kupën e Botës. Kryebashkiaku Zohran Mamdani njoftoi të enjten se 1,000 bileta me vlerë 50 dollarë do t’u vihen në dispozicion banorëve të qytetit.

Rreth 150 bileta për ndeshje do të jenë në dispozicion për shtatë nga tetë ndeshjet e luajtura në stadiumin MetLife me afërsisht 82,000 vende në New Jersey. I vetmi përjashtim është finalja e 19 korrikut, ku kërkesa është e lartë, ku disa vende tani kushtojnë gati 33,000 dollarë.

Biletat do të përfshijnë gjithashtu transport falas me autobus vajtje-ardhje për në stadium. Ato do të shpërndahen nëpërmjet një llotarie duke filluar nga 25 maji.

Mamdani tha se qyteti do të ndërmarrë hapa për të siguruar që ato t’u shkojnë banorëve të qytetit të Nju Jorkut dhe të mos rishiten.

Ai tha se biletat nuk do të jenë të transferueshme dhe se do të ketë një “shumë mënyra” se si zyrtarët e qytetit do të verifikojnë vendbanimin. Ato gjithashtu do t’u shpërndahen direkt tifozëve vetëm kur ata të hipin në autobus ditën e ndeshjes.

Gjatë fushatës së tij, Mamdani i kishte bërë thirrje FIFA-s që ta bënte më të lirë për njujorkezët pjesëmarrjen në ndeshje duke lënë mënjanë 15% të biletave me çmime të zbritura për banorët. Ai gjithashtu kishte nisur një peticion duke i bërë thirrje FIFA-s të ndryshonte planin e saj për të vendosur çmimet e biletave bazuar në kërkesë.

Biletat 50 dollarëshe nuk vijnë direkt nga FIFA, por nga ato të ndara për komitetin e përbashkët pritës të lojërave të Nju Jorkut dhe Nju Xhersit, sipas zyrës së kryetarit të bashkisë.