Manjani për përmbaruesit, llogari bankare për shërbimin

Përmbaruesit privat nuk do të përdorin më llogaritë e tyre personale bankare për shërbimet që kryejnë mes palëve për transaksionet financiare.

Ministri i Drejtësisë Ylli Manjani, nisur nga rasti më i fundit i abuzimit të përmbaruesit privat, Martin Tusha, i cili përvetësoi një shumë të konsiderueshme në mënyrë të paligjshme, ka lëshuar një udhëzim të posaçëm, sa i takon procedurave teknike të transaksioneve financiare nga debitorë tek kreditori.

Kështu tanimë, përmbaruesit e kanë të detyrueshme të hapin një llogari rrjedhëse të dedikuar për shërbimet që kryejnë. Të gjitha transaksionet financiare dhe tarifat e shërbimit duhet të kalojnë nëpërmjet kësaj llogarie, dhe jo më në llogaritë personale të përmbaruesve. Më tej në udhëzim përcaktohet se debitori ndaj të cilit ka filluar procedura e ekzekutimit të urdhrit të ekzekutimit, detyrohet t’i paguajë detyrimin dhe tarifën subjektit përmbarimor.