Manovra ushtarake amerikano-gjeorgjiane nën hijen e Rusisë

Gjeorgjia dhe SHBA-ja filluan sot manovrat e përbashkëta më të rëndësishme ushtarake, një shenjë mbështetjeje për vendin e vogël kaukazian, marrëdhëniet e të cilit janë tendosur me Rusinë.

Fillimi i këtyre manovrave ndodhi një ditë para një vizite dyditore në Tbilisi të zëvendëspresidentit amerikan, Mike Pence, gjatë të cilës ai do të përsërisë mbështetjen e Uashingtonit për aspiratën e Gjeorgjisë për t’iu bashkuar NATO-s.

Pence filloi sot nga Estonia një turne destinuar për të garantuar anëtarët e vegjël balltikë të NATO-s para se të vijojë të njëjtin mision në Gjeorgji dhe në Malin e Zi.

Rreth 800 ushtarë gjeorgjianë dhe 1 600 ushtarë amerikanë marrin pjesë në këto manovra të quajtura “Noble Partner 2017” dhe parashikuar deri më 12 gusht.

Ato do të përfshijnë gjithashtu 400 ushtarë të ardhur nga Armenia, Gjermania, Sllovenia, Turqia, Ukraina dhe Britania e Madhe.

Bëhet fjalë për manovrat e përbashkëta më të rëndësishme amerikano-gjerogjiane organizuar në Gjeorgji që prej konfliktit me Rusinë në vitin 2008.

Ministri gjeorgjian i Mbrojtjes, Levan Izoria e cilësoi të pazakontë përmasën e këtyre manovrave duke nënvizuar se do të shprehnin qartë mbështetjen e Gjeorgjisë për vendet anëtare të NATO-s, veçanërisht për SHBA-në.