Maqedonasit bastojnë më shumë sesa investojnë: 852 milionë euro në lojërat e fatit, vetëm 372 milionë në fondet investuese

Maqedonasit e Veriut i besojnë më shumë basteve sesa investimeve afatgjata. Sipas një analize të portalit Bankarstvo.mk të publikuar në vitin 2026, kompanitë e lojërave të fatit në vend deklaruan gjatë vitit 2025 të hyra prej 852,2 milionë eurosh, me një rritje të vazhdueshme nga 836,5 milionë euro në 2024 dhe 791,3 milionë euro në 2023. Për tre vjet me radhë, sektori i lojërave të fatit ka deklaruar afërsisht 2,48 miliardë euro të hyra.

Në të njëjtën periudhë, kursimi përmes tregjeve financiare mbetet shumë më modest. Në fondet e hapura investuese, gjatë vitit 2025 u derdhën rreth 372 milionë euro (22,9 miliardë denarë), por nga to u tërhoqën rreth 279 milionë euro (17,18 miliardë denarë). Hyrja neto e kapitalit të ri, pra, ishte vetëm rreth 93 milionë euro. Në fund të vitit 2025, asetet totale të fondeve arritën rreth 478 milionë euro (29,37 miliardë denarë).

Krahasimi i shifrave është domethënës: të hyrat e sektorit të lojërave të fatit janë 2,3 herë më të mëdha se derdhjet bruto në fondet investuese dhe mbi 9 herë më të mëdha se hyrjet neto. Hendeku bëhet edhe më i dukshëm kur shikohen fitimet e deklaruara nga lojtarët: sipas Drejtorisë së të Hyrave Publike, në deklaratat tatimore të vitit 2025 u deklaruan 180,7 milionë euro fitime nga lojërat e fatit.

Duhet sqaruar se të hyrat e kompanive të lojërave të fatit nuk janë të barabarta me humbjet e lojtarëve, pasi një pjesë e konsiderueshme e parave kthehet te lojtarët në formën e fitimeve. Megjithatë, raporti mes qindra milionave eurove që rrjedhin drejt basteve dhe dhjetëra milionave që investohen në fondet afatgjata tregon nivelin e ulët të kulturës financiare: maqedonasit vazhdojnë t’i besojnë fatit më shumë sesa investimeve të planifikuara.

Burimi: Bankarstvo.mk