Marrëveshje me SHBA? Irani nuk sprapset: s’ndalim pasurimin e uraniumit, WSJ vlerëson ende 1.500–2.500 raketa në arsenalin e Teheranit

Irani nuk ka asnjë synim të sakrifikojë programin e pasurimit të uraniumit në këmbim të një marrëveshjeje me Shtetet e Bashkuara. Siç njofton Shqiptarja.com, zëdhënësi i Ministrisë së Jashtme iraniane, Esmaeil Baqaei, deklaroi sipas agjencisë Fars: “Ne nuk jemi të gatshëm të ulim nivelin e pasurimit të uraniumit dhe as të pranojmë pezullimin e procesit të pasurimit për të arritur një marrëveshje”.

Ndërkohë, aftësitë e Iranit për një rikthim në luftë mund të jenë ende të larta. Sipas një vlerësimi të shërbimeve amerikane të inteligjencës, të cituar nga The Wall Street Journal, Teherani mund të disponojë ende një arsenal prej 1.500 deri në 2.500 raketash, pavarësisht muajve të sulmeve amerikane dhe izraelite ndaj infrastrukturës së tij ushtarake, duke ruajtur kapacitete të konsiderueshme për të goditur objektiva amerikane dhe të aleatëve në rajon. Zyrtarët amerikanë sqarojnë megjithatë se vlerësimi konsiderohet me besueshmëri të ulët, për shkak të vështirësisë për të përcaktuar sa raketa janë gati për lëshim e sa ruhen në depo.

Mundësitë për një marrëveshje mes SHBA-së dhe Iranit janë zvogëluar ndjeshëm ditët e fundit. Një nga arsyet, sipas gazetës izraelite Israel Hayom, është informacioni që Mossad-i i ka përcjellë CIA-s, sipas të cilit Irani do të synonte të godiste presidentin Donald Trump dhe zyrtarë të lartë të administratës së tij; sipas zyrtarëve të lartë izraelitë dhe amerikanë, këto kërcënime janë ndër faktorët kryesorë pas ndryshimit të qëndrimit të Trumpit ndaj negociatave me Teheranin.