Marty: Prokuroria e Pergjithshme rrezon akuzat
Prokuroria e Përgjithshme e Republikës së Shqipërisë ka hedhur poshtë akuzat që ngrihen në raportin e raportuesit të KiE, Dick Marty, mbi transplantimin e organeve në zona të caktuara të Shqipërisë.
Në një deklaratë për shtyp, zëdhënësi i Prokurorisë së Përgjithshme ka deklaruar se akuzat e përmendura në raport nuk kanë bazë ligjore dhe për rrjedhojë pamundësojnë hetimin.
“Në bazë të verifikimit të përbashkët, mes ekspertëve shqiptarë dhe hetuesve të Hagës, nuk ka rezultuar se të dhënat e parashtruara të kenë një bazë vërtetësie, prandaj prokuroria nuk ka gjetur bazë për nisjen e cështjes penale”, ka deklaruar zëdhënësi Plator Nesturi.
Ai ka theksuar se Prokuroria e Përgjithshme nuk ka pasur asnjë të dhënë për kryerjen e aktiviteteve të tilla në Shqipëri, madje as nga institucionet ndërkombëtare.
“Akuzat në raportin e Dick Marty, se në Shqipëri janë kryer transplantime organesh, janë të dhëna për të cilat prokuroria e Shqipërisë nuk ka pasur asnjë dijeni dhe nuk ka pasur kërkesë për hetim nga asnjë organ ndërkombëtar”, ka sqaruar Nesturi.
Ai ka hedhur poshtë edhe akuzat e bëra së fundmi nga ish-prokurorja Carla del Ponte, se Shqipëria ka penguar hetimet e Hagës mbi këtë cështje, përgjegjësia e të cilës i atriubohet ish-drejtuesve të UCK-së.
“Prokuroria e Shqipërisë e deklaron të pabazë insinuatën se, institucionet shqiptare janë bërë pengesë për hetimin e kësaj cështjeje. Prokuroria shpreh gatishmërinë për të vijuar bashkëpunimin me të gjitha institucionet ndërkombëtare”, ka shtuar zëdhënësi.
