Mehrdad Akhlaqi Ketabchi miratohet si ministër i ri i mbrojtjes i Iranit dhe paralajmëron SHBA-në: Përgjigjja do të jetë befasuese

Parlamenti i Iranit miratoi të dielën Mehrdad Akhlaqi Ketabchi-n si ministër të mbrojtjes, duke i dhënë fund muajve të drejtimit të përkohshëm të ministrisë dhe duke vënë në krye të aparatit të prodhimit dhe prokurimit të mbrojtjes një veteran të sektorit, siç njofton Reuters.

Akhlaqi zëvendëson Majid Ebn al-Reza-n, i cili e drejtonte ministrinë përkohësisht pasi ministri i atëhershëm i mbrojtjes, Aziz Nasirzadeh, u vra nga sulmet amerikano-izraelite në shkurt. Ministri i ri ka kaluar dekada në industrinë iraniane të mbrojtjes, me poste të larta në sektorët e hapësirës ajrore dhe të raketave, dhe ndodhet nën sanksione të SHBA-së dhe Bashkimit Evropian për punën e tij në këtë sektor.

Në programin e paraqitur para deputetëve, Akhlaqi u zotua të rindërtojë infrastrukturën ushtarako-industriale të vendit, të përshpejtojë zhvillimin e teknologjive të mbrojtjes dhe të zgjerojë bashkëpunimin me kompanitë e sektorit privat.

Paralajmërimi i tij për Uashingtonin ishte i drejtpërdrejtë: nëse armiku amerikan bën një tjetër gabim në llogaritje, përgjigjja e popullit iranian do të jetë befasuese dhe e gjerë. Ai shtoi se Teherani ka marrë masat e nevojshme për t’iu kundërvënë përdorimit të mundshëm nga SHBA-ja të “nënës së të gjitha bombave” kundër Iranit.

Sipas raportimit të Reuters-it, CNN ka njoftuar këtë javë se SHBA-ja ka hartuar plane sulmi që mund të përfshijnë përdorimin e bombës GBU-43/B, armës më të madhe jobërthamore në arsenalin amerikan, kundër infrastrukturës energjetike dhe objekteve bërthamore të Iranit, nëse presidenti Donald Trump urdhëron rifillimin e operacioneve luftarake. “Presidenti amerikan duhet të përqendrohet që forcat e tij të tërhiqen shëndoshë nga rajoni ynë”, tha Akhlaqi, duke paralajmëruar se nëse hidhet qoftë edhe një bombë e vetme, Trump do të shohë sa nga trupat e tij do të largohen nga rajoni në pozicion horizontal.