Merr fund arratia, arrestohet 22-vjeçari që grabiti argjendarinë në Kamëz

Një nga autorët e grabitjes së një argjendarie në Kamëz është arrestuar këtë të enjte nga policia. Në pranga ka rënë 22-vjeçari Elez Hysa, ndërsa bashkëpunëtori i tij vijon të jetë në kërkim.

Sipas uniformave blu, i riu dyshohet se është i implikuar në grabitjen me armë të ndodhur më 16 maj 2026, në një argjendari në pronësi të shtetasit me iniciale O.L., ku autorët morën një sasi bizhuterish.

Gjatë operacionit, policia bëri të mundur edhe sekuestrimin e disa sendeve të kundërligjshme, të cilat konsiderohen të vlefshme për hetimin.

Blutë bëjnë me dije se hetimet vijojnë për identifikimin dhe kapjen e autorit të dytë, si dhe për dokumentimin e plotë të ngjarjes.

Materialet procedurale i janë referuar Prokurorisë për veprën penale “Vjedhja me dhunë”, kryer në bashkëpunim.