Meta i përgjigjet PD-së: Komisioni i reformës zgjedhore votohet të enjten

Kryetari i Kuvendit Ilir Meta i përgjigjet Partisë Demokratike duke theksuar se komisioni i reformës zgjedhore do të votohet ditën e enjte, pra në përputhje me kërkesën e tyre.

“Kryetari i Kuvendit Ilir Meta, në vijim të kërkesës së tij drejtuar grupeve parlamentare për ngritjen e Komisionit të Posaçëm për Reformën zgjedhore dhe menjëherë pasi u njoh me kërkesën e grupit parlamentar të Partisë Demokratike për plotësimin e këtij komisioni me përfaqësues të Grupeve Parlamentare, shpreh bindjen e tij se ky vendim do të merret në seancën më të parë të Kuvendit, atë të datës 28 Janar 2016”, thuhet në njoftimin zyrtar.

Kryetari I Kuvendit shprehet se Reforma Zgjedhore duhet trajtuar me seriozitet dhe në përputhje me frymën e rekomandimeve të OSBE-ODIHR dhe të kryhet në kohën e duhur dhe transparencë të plotë.