Meta: Marrëdhëniet mes Arabisë Saudite dhe Shqipërisë, të ngrihen në nivelin e miqësisë

Kryetari i Kuvendit, Ilir Meta priti sot Ambasadorin e ri të Arabisë Saudite në Shqipëri, Talat Salem Radwan të cilit i uroi mirëseardhjen në vendin tonë dhe suksese në detyrën e re.

Fillimisht, Meta i ngushëllimet më të sinqerta për ndarjen nga jeta të Madhërisë së Tij Mbretit Abdullah bin Abdulaziz Al Saud të Arabisë Saudite, kujtimi i të cilit përfaqëson një gur solid stabiliteti, sigurie e paqeje në Lindjen e Mesme e më gjerë.

Duke vlerësuar marrëdhëniet e ngrohta që ekzistojnë mes dy popujve dhe mes dy vendeve, Kryeparlamentari Meta shprehu vullnetin për intensifikimin e bashkëpunimit parlamentar përmes grupeve të miqësisë dhe shkëmbimeve të nivelit të lartë politik, duke nënvizuar se marrëdhëniet dypalëshe duhet të ngrihen në nivelin e miqësisë së shkëlqyer që ekziston mes dy popujve tanë.

Ambasadori i Arabisë Saudite në Shqipëri, Talat Salem Radwan shprehu kënaqësinë e fillimit të detyrës së tij në Shqipëri dhe përcolli përshëndetjet më të ngrohta të Kryetarit të Parlamentit të Arabisë Saudite Dr. Al-Sheikh.

Ambasadori Talat Salem Radwan e siguroi Kryetarin e Kuvendit  se me mbështetjen e autoriteteve të të dy vendeve, Ambasada do të punojë për forcimin konkret të marrëdhënieve mes Arabisë Saudite dhe Shqipërisë.