Meta: Në reformën zgjedhore të dënohen ashpër ata që vjedhin vota
Kryetari i Kuvendit, Ilir Meta ka shprehur se LSI e mbështet zbatimin e plotë të rekomandimeve të OSBE-ODIHR-it për reformën zgjedhore. Sipas tij në këtë reformë duhet të përfshihen nene që do sanksionoojnë ashpër vjedhjen e votës.
“Për këtë qëllim besoj është shumë e rëndësishme që të gjithë forcat politike të tregojnë vullnet për të respektuar standardet e zgjedhjeve, procesin e dekriminalizimit, që është shumë i rëndësishëm për të krijuar një klimë sa më konstruktive në zgjedhjet e ardhshme dhe për të sjellë një cilësi të re të përfaqësimit në Parlamentin e Shqipërisë për qytetarët shqiptarë, pavarësisht nga bindjet e tyre politike. Besoj se kjo është një detyrë e të gjithë forcave politike.” tha Kryetari i LSI, Meta
Ai ka bërë thirrje të merren masa ekstreme për të dënuar të gjithë ata të cilët do të tentojnë të cenojnë votën e qytetarëve shqiptarë, ta kushtëzojnë atë, ta fotografojnë atë, ta blejnë atë dhe ta manipulojnë atë.
“Kjo është mjaft e rëndësishme dhe me këtë frymë, në këtë drejtim duhet të punojmë të gjithë për ta kurorëzuar këtë reformë.” tha Meta.
