Milatoviq pret në Cetinjë ministrin kinez Wang Yi: marrëdhëniet kanë përparuar ndjeshëm në dy dekada

Presidenti i Malit të Zi, Jakov Milatoviq, priti të shtunën në Cetinjë ministrin e Punëve të Jashtme të Kinës, Wang Yi, siç njofton Portal Analitika. Kjo është vizita e parë e një ministri të Jashtëm kinez në Mal të Zi që nga ripavarësia e vendit, dhe gjatë takimit u bisedua për thellimin e dialogut politik, bashkëpunimin ekonomik, projektet infrastrukturore, tregtinë dhe turizmin, si dhe për çështje rajonale e globale.

Milatoviq tha se marrëdhëniet mes dy vendeve kanë përparuar ndjeshëm gjatë dy dekadave të fundit, veçanërisht në fushën e ekonomisë, dhe se ka hapësirë për përparim të mëtejshëm, me respektimin e standardeve ndërkombëtare, bën të ditur kabineti i presidentit. Vëmendje e veçantë iu kushtua projekteve infrastrukturore ku marrin pjesë kompani kineze, përfshirë ndërtimin e segmentit të dytë të autostradës Bar–Boljare, nga Mateševa në Andrijevicë, i cili financohet me grant të BE-së dhe kredi të BERZH-it.

Sipas njoftimit të kabinetit, u fol edhe për shkëmbimin tregtar, i cili është rritur ndjeshëm vitet e fundit — Kina është partneri më i madh i jashtëm tregtar i Malit të Zi në Azi — si dhe për mundësitë e plasimit më të mirë të produkteve malazeze në tregun kinez dhe potencialin turistik, duke pasur parasysh rritjen e numrit të turistëve kinezë.

Milatoviq prezantoi katër prioritetet e politikës së jashtme të Malit të Zi: anëtarësimin e besueshëm në NATO, ku vendi është anëtar që nga 2017; anëtarësimin në Bashkimin Evropian si qëllimin më të rëndësishëm strategjik; bashkëpunimin rajonal për një Ballkan Perëndimor paqësor e të begatë; dhe përkushtimin ndaj OKB-së dhe rendit ndërkombëtar të bazuar në rregulla.

Wang Yi vlerësoi se bashkëpunimi Kinë–Mal i Zi është shembull i mirë i marrëdhënieve mes shteteve pavarësisht madhësisë së tyre. “Kina beson se të gjitha shtetet janë të barabarta, pavarësisht madhësisë. Ne respektojmë zgjedhjet e politikës së jashtme të Malit të Zi, si dhe rrugën e tij politike dhe të zhvillimit”, tha ai, duke falënderuar Podgoricën për mbështetjen e vazhdueshme ndaj politikës së “një Kine” dhe duke shprehur qëndrim pozitiv për perspektivën evropiane të Malit të Zi.