Mimoza Hafizi: Pse u largova nga Partia Socialiste

Bashkëthemeluesja e partisë LIBRA, Mimoza Hafizi ka qenë e ftuar në “Studio e Hapur” ku tema e diskutimit ishte “Individi, përballë kryetarit në politikë”.

Ajo ka treguar arsyet që e shtynë në krijimin e partisë së re dhe ndarjes nga Partia Socialiste.

Hafizi u shpreh se mungesa e demokracisë dhe thyerja një nga një e rregullave brenda për brenda partisë, ishin motivet kryesore që e çuan atë dhe ish-deputetin e PS-së, Blushi, të reagonin duke hapur një parti të re.

Sipas Mimoza Hafizit, LIBRA nuk do të trashëgojë asnjë cilësi të partive të vjetra.

“Partitë e reja që po krijohen janë shprehje e etjes për demokraci. Pasi këto parti që janë nuk lënë shteg për demokraci brenda partisë. LIBRA si parti e re ka lindur në dy faza: ajo e reaksionit, shkëputje nga PS e dy deputetëve, ne reaguam kundër mungesës së demokracisë. Këto rregulla të shkruara në statutin e PS, u thyen një nga një. Ne kishim një betejë konkrete. Kjo ishte faza e parë. Kur ne e pamë dhe e treguam para të gjithëve se brenda PS nuk kishte shpresë funksionimi, u shkëputëm nga kjo parti dhe lindi LIBRA që inspiron të mos trashëgojë asnjë cilësi të këtyre partive të vjetra”, deklaroi Hafizi.