Ministri iranian i Naftës: Do të përgjigjemi menjëherë ndaj çdo kërcënimi amerikan ndaj objekteve tona energjetike

Ministri i përkohshëm iranian i Naftës, Hamid Bord, ka paralajmëruar se Irani do të përgjigjet menjëherë dhe në mënyrë të përshtatshme ndaj çdo kërcënimi amerikan ndaj objekteve të tij energjetike. Deklarata u raportua të premten nga Al Jazeera, sipas së cilës Bord tha se Teherani do të marrë masa të sakta hakmarrëse, në kohën e duhur, për t’iu kundërvënë kërcënimeve të armikut.

Sipas ministrit iranian, lufta e nisur nga Shtetet e Bashkuara, në shpërfillje të normave ndërkombëtare, ka prekur gjithë sektorin global të energjisë. Deklarata vjen në një moment kur në Uashington raportohet se ushtria amerikane po përgatit opsione të reja goditjesh ndaj infrastrukturës energjetike dhe objekteve bërthamore të Iranit, ndërsa presidenti Donald Trump ka folur së fundmi edhe për një goditje të mundshme ndaj objektit nëntokësor të njohur si Pickaxe Mountain.

Kërcënimi i Bordit e ngre më tej rrezikun për objektet energjetike në gjithë rajonin e Gjirit Persik. Prej muajsh, sulmet ndaj anijeve pranë Ngushticës së Hormuzit dhe goditjet ndaj infrastrukturës së naftës në Arabinë Saudite dhe në vende të tjera të Gjirit e kanë mbajtur tregun global të naftës nën presion, ndërsa bllokada detare amerikane ndaj porteve iraniane vazhdon.

Hamid Bord u emërua ministër i përkohshëm i Naftës në fillim të tetorit, pasi presidenti Masoud Pezeshkian pranoi dorëheqjen e paraardhësit të tij, Mohsen Paknejad. Ai e merr drejtimin e sektorit më jetik të ekonomisë iraniane në kulmin e presionit amerikan, kur eksportet e naftës së Iranit janë goditur rëndë nga bllokada dhe sanksionet, ndërsa Teherani këmbëngul se nuk do të tërhiqet pa u respektuar, siç i quan ai, të drejtat e vendit.