Misioni i NATO-s në Afganistan zgjatet përtej 2016-

Sekretari i përgjithshëm i NATO-s Jens Stoltenberg njoftoi të premten zgjatjen e misionit në Afganistan përtej vitit 2016. Shpallja u bë pas takimit të ministrave të Jashtme të NATO-s dhe përfaqësuesve të vendeve që marrin pjesë në Misionin Mbështetës në Afganistan.

Sekretari Stoltenberg u shpreh se për shkak të gjendjes serioze të sigurisë, NATO-ja vendosi zgjatjen e misionit të trupave të saj. Deri tani, NATO-ja ka ofruar mbi 1.4 miliardë dollarë amerikanë për fondin e trupave afgane të sigurisë.

Ai bëri të ditur gjithashtu se në samitin e Varshavës që do të zhvillohet në korrik, ka mundësi që palët të bien dakord për zgjatjen e programit të ndihmës deri në vitin 2020.

Në Misionin Mbështetës për Afganistan marrin pjesë gjithsej 39 vende anëtare të NATO-s, si dhe disa vende joanëtare. Tani, ka mbi 12 mijë trupa të dislokuara në Afganistan.