MKRS: Të mbrojmë trashëgiminë kulturore
Ministri i Kulturës, Rinisë dhe Sportit, Kujtim Shala, vizitoi sot Institutin për Mbrojtjen e Monumenteve të Kosovës, ku u takua me drejtorin e këtij institucioni, Alban Bakia, dhe anëtarët e Këshillit Drejtues.
Gjatë takimit u bisedua për programin e këtij institucioni për këtë vit, por edhe për rolin dhe rëndësinë që ka ky Institut në ruajtjen e trashëgimisë kulturore të Kosovës.
Drejtuesit e këtij institucioni e informuan ministrin Shala me punët dhe programin për këtë vit, me një theks të veçantë me punët që po bëhen në konsolidimin e mëtejshëm të tij, në funksion të shtimit të kapaciteteve për të ruajtur trashëgiminë kulturore të Kosovës.
Ministri Shala duke premtuar mbështetje për këtë institucion u shpreh se IMMK-ja është institucion jashtëzakonisht i rëndësishëm, i cili kujdeset për ruajtjen e trashëgimisë së Kosovës.
Sipas një komunikate të MKRS-së, ndërmjet ministrit Shala dhe drejtuesve të këtij institucioni u bisedua edhe rreth rëndësisë që ka gjetja e mekanizmave për ruajtjen e trashëgimisë kulturore të Kosovës, ndaj kërkohet vetëdijësim dhe bashkëpunim i ngushtë i gjithë faktorëve për ruajtjen e saj, sepse ajo përbën vlerë të jashtëzakonshme për Kosovën dhe është identiteti i saj historik.
