“Mos prisni perfeksion nga PD”, Këlliçi: Jemi ende duke u organizuar. Pas dy javësh do ta shihni…

Duke folur për procesin e brendshëm zgjedhor, deputeti demokrat Belind Këlliçi, i cili ishte i ftuar në Opinion, pranoi se procesi i zgjedhjeve në PD nuk ishte perfekt.

Ai u shpreh se “nuk mund të presësh perfeksion nga opozita”, sidomos në kushtet ku ndodhet, megjithatë më tej ai paralajmëroi se riorganizimi në PD nuk do të përfundojë me zgjedhjet e së shtunës.

“Nuk ka përfunduar me këtë votëbesim procesi në PD i zgjedhjeve apo i riorganizimit. Në datë 30 maj, ditën e shtunë, ju do të keni Kuvendin Kombëtar që do të fokusohet në dy drejtime, në riorganizimin, që është kryefjalë e këtij Kuvendi që do ta dëgjoni. Pra do kemi një formulë të re, një platformë të re e cila është përgatitur së bashku me Institutin Republikan Amerikan dhe me fondacionin suedez Jarl Hjalmarson Foundation, për të paraqitur një platformë tejet moderne e kontemporane të vlerësimit të performancës të çdo niveli drejtues në PD, duke filluar nga kryetari i saj.

Dhe më pas do të shihni edhe pjesën e digjitalizimit të PD-së dhe pjesën e riorganizimit të brendshëm që do të mbyllet me ripërtëritjen që ndodh pas 2 javësh. Çfarë do të thotë? Pas 2 javësh do të jenë zgjedhjet për të gjitha forumet e larta drejtuese, ku edhe pyetja juaj, me të drejtë, do të marrë përgjigje. Ku do të shihni, jam i bindur, shumë kandidatura të reja, shumë të rinj, shumë të reja që do të marrin patjetër pjesë në garë, të rinj deri në 35-vjeç. Të garantoj që do të ketë një hapje shumë të madhe!”, tha Këlliçi.

Sjellim ndërmend se të shtunën e datës 23 maj, demokratët iu drejtuan kutive të votimit për të marrë pjesë në referendumin për konfirmimin ose jo të Berishës në krye të Partisë Demokratike. Pas përfundimit të votimit në orën 19:00, Berisha u rikonfirmua në krye të partisë me 37 mijë e 341 vota pro. Ai mori 1 mijë e 55 vota “kundër” dhe 506 abstenim.