Naço-Jashari: Bashkëpunim më të gjerë në fushën e drejtësisë

Forcimi i marrëdhënieve dypalëshe mes Shqipërisë dhe Maqedonisë në fushën e drejtësisë ishte në fokus të takimit mes Ministrit të Drejtësisë shqiptare, Nasip Naço dhe homologut të tij maqedonas, Adnan Jashari.

Burime nga Ministria e Drejtësisë njoftojnë se gjatë takimit të dy ministrat u ndalën tek rëndësia e reformës në drejtësi, duke i paraqitur dhe projektet reciproke njëri-tjetrit, ndërsa ranë dakord që në kuadër të përmirësimit të sistemit të drejtësisë të ketë një bashkëpunim më të gjerë për përmirësimin e sistemit të drejtësisë në dy vendet.

Ministri Jashari e informoi ministrin Naço se Republika e Maqedonisë po realizon  ndryshime kushtetuese në kuadër të reformës në sistemin e drejtësisë, reforma këto  që  prekin funksionimin e sistemin gjyqësor dhe efektivitetin e procesit kontrollues dhe llogaridhënës të gjyqtarëve.

Ndërkohë, edhe për ministrin Naço mbetet prioritare nevoja e reformimit të sistemit gjyqësor në Shqipëri, reformë kjo e cila do të prekë disa nga ligjet që rregullojnë organizimin dhe funksionimin e Gjykatës së Lartë, Këshillit të Lartë të Drejtësisë,  Gjykatës Kushtetuese, Këshillin e Prokurorisë së Përgjithshme, etj.

Gjithashtu Naço bëri  një  prezantim të  ndryshimeve të  ndërmarra në ligjet  kryesore  si Kodin e Procedurës Penale, Paketën Ligjore Antimafia si dhe ligje të tjera që kanë ndikuar në përmirësimin e luftës kundër korrupsionit në sistemin e drejtësisë. Më tej, biseda u fokusua në bashkëpunimin gjyqësor ndërmjet dy vendeve tona dhe ministrat shprehën vullnetin për forcimin e mëtejshëm të këtij bashkëpunimi, kjo dhe në kuadër të iniciativave të përbashkëta rajonale, me qëllim intensifikimin e  luftës kundër krimit të organizuar, korrupsionit si dhe dekurajimin e çdo veprimtarie të kundraligjshme në rajon dhe më gjerë.

Vizita e ministrit Naço në vendin fqinj do të zgjasë dy ditë.