Nata e 17-të e protestës “Jo në emrin tim”: protestuesit marshojnë drejt Ministrisë së Drejtësisë, Haziri: “Nuk do të ndalemi”

Sonte, në natën e 17-të me radhë të protestës “Jo në emrin tim”, qindra qytetarë u mblodhën në sheshin “Skënderbeu” në Prishtinë për të kundërshtuar vendimin dënues të Dhomave të Specializuara në Hagë ndaj ish-krerëve të UÇK-së, siç raporton Klan Kosova. Ndryshe nga netët e mëparshme, protesta mori një rrjedhë tjetër: pas fjalimeve në shesh, protestuesit nisën marshimin drejt Ministrisë së Drejtësisë.

Organizatori i protestave “Jo në emrin tim”, Çlirim Haziri, u shpreh para protestuesve se nuk do të ndalen derisa ministria ta procedojë ligjin për Specialen. “Ne nuk do të ndalemi, derisa kjo ministri ta procedojë Ligjin. Nuk do të ndalemi asnjëherë”, tha Haziri, sipas raportimit të Klan Kosova.

Gjatë rrugës nga sheshi “Skënderbeu” deri te ministria, protestuesit thërrisnin “UÇK, UÇK” dhe i bënë thirrje Ministrisë së Drejtësisë ta votojë ligjin, raportoi nga vendi i ngjarjes gazetari Kastriot Tahiri i Klan Kosova. Sipas tij, protestuesit thanë se ligji i përgatitur nuk duhet të qëndrojë në tavolinat e ministrisë, por duhet të votohet sa më parë, pasi, sipas tyre, ai mbron vlerat e UÇK-së.

Në oborrin e Ministrisë së Drejtësisë u hodhën edhe disa mjete piroteknike, ndonëse organizatorët kishin bërë thirrje që të mos bëhej një gjë e tillë, raportoi Tahiri. Policia ishte e pranishme në numër të shtuar duke mbrojtur objektin, ndërsa rrugët përreth u bllokuan dhe qarkullimi i automjeve u menaxhua nga Policia e Kosovës.

Me përfundimin e protestës, si zakonisht u këndua kënga “Besa-Besë” dhe qytetarët filluan të shpërndaheshin, për t’u mbledhur sërish në orarin e ri — 19:00 — që hyri në fuqi nga sot, njoftoi Klan Kosova.