Projektligji i ri për ushqimin, prodhuesit përgjegjës deri në shitje dhe gjurmim për çdo produkt
Projektligji i ri “Për ushqimin”, i hedhur për konsultim publik nga Ministria e Bujqësisë, ia kalon biznesit përgjegjësinë kryesore për sigurinë e ushqimit, nga prodhimi deri te shitja, me gjurmim të plotë për çdo produkt.
Ministria e Bujqësisë ka hedhur për konsultim publik projektligjin e ri “Për ushqimin”, siç njofton Shqiptarja.com, dhe drafti parashikon që ligji i ri të zëvendësojë ligjin e vitit 2008 për ushqimin. Qëllimi i tij është të forcojë sigurinë ushqimore, duke e vendosur përgjegjësinë kryesore te bizneset që prodhojnë, përpunojnë dhe shesin ushqim.
Sipas draftit, prodhuesit do të jenë përgjegjës për sigurinë e ushqimit nga prodhimi deri te shitja. Ata do të duhet të gjurmojnë origjinën e çdo produkti, si dhe vendet ku e kanë shpërndarë atë, në mënyrë që çdo produkt të mund të ndiqet hap pas hapi deri te konsumatori.
Nëse një biznes konstaton se një ushqim mund të paraqesë rrezik, ai do të jetë i detyruar ta tërheqë menjëherë nga tregu dhe të njoftojë autoritetet. Edhe pa prova të plota shkencore, ministria do të mund të marrë masa të përkohshme, si bllokimin e mallit ose pezullimin e aktivitetit, kur identifikohet një rrezik i mundshëm për shëndetin.
Projektligji parashikon krijimin e një Sistemi Kombëtar të Njoftimit të Shpejtë dhe, kur të jetë e nevojshme, të një Njësie Kriza. Gjithashtu do të ngrihet një Komision i përhershëm i pavarur për Vlerësimin e Riskut, me 7 anëtarë, i cili do të vlerësojë rreziqet për njerëzit dhe kafshët, ndërsa produktet që kërkojnë autorizim paraprak, si ushqimet e reja, enzimat, aromatizuesit dhe organizmat e modifikuar gjenetikisht, do të vlerësohen nga një komision me 5 anëtarë.
Licencimi do të kalojë në regjistrimin e njësive, ndërsa përpunuesit e produkteve me origjinë shtazore do të duhet të marrin miratim paraprak. Gjobat e parashikuara variojnë nga 80 mijë deri në 2 milionë lekë, ndërsa pezullimi parashikohet kur rrezikohet shëndeti ose jeta. Kostoja e zbatimit vlerësohet deri në 5,81 milionë lekë për vitet 2027–2029, nga të cilat 4,91 milionë lekë për anëtarët e dy komisioneve dhe 900 mijë lekë për ekspertizë të specializuar.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.