Ndërron jetë në moshën 86-vjeçare Pavle Jevremoviç, ambasadori i parë i RFJ-së në BE dhe ambasador i Serbisë në OKB

Pavle Jevremoviç, doktor i shkencave juridike dhe ambasadori i parë i Republikës Federale të Jugosllavisë (RFJ) në Bashkimin Evropian pas ndryshimeve politike të vitit 2000, ndërroi jetë në Beograd në moshën 86-vjeçare, njoftoi sot Lëvizja Evropiane në Serbi.

Jevremoviç lindi në vitin 1940 në Uzhicë. Gjatë karrierës së tij diplomatike shumëdekadëshe shërbeu në Indi dhe në Shtetet e Bashkuara të Amerikës dhe njihej si njohës i mirë i Lëvizjes së të Paangazhuarve dhe i marrëdhënieve ndërkombëtare, raportojnë mediat serbe për njoftimin e Lëvizjes Evropiane.

Pas ndryshimeve demokratike të 5 tetorit 2000, si këshilltar i politikës së jashtme i presidentit të RFJ-së Vojislav Koshtunica, ai mori pjesë në rivendosjen e pozitës ndërkombëtare të vendit. Sipas Lëvizjes Evropiane në Serbi, veçanërisht i rëndësishëm ishte kontributi i tij në procesin e rikthimit të anëtarësisë së RFJ-së në Kombet e Bashkuara, në rinovimin e marrëdhënieve me BE-në dhe në zhvillimin e bashkëpunimit politik dhe ekonomik.

Jevremoviç ishte ambasadori i parë i RFJ-së në BE pas ndryshimeve të vitit 2000, e më pas ambasador i Serbisë në Kombet e Bashkuara. Ai i përkiste brezit që e fitoi përvojën profesionale në rrethana të ndërlikuara ndërkombëtare dhe që, pas ndryshimeve të mëdha politike, pati rol të rëndësishëm në rivendosjen e lidhjeve ndërkombëtare të Serbisë dhe në afrimin e saj me Evropën. Ishte anëtar aktiv i Forumit për Marrëdhënie Ndërkombëtare që nga themelimi i tij.