Ndërtimi i gazjsellësit TAP, SPIECEBAG fiton tenderin për 760 km tubacione

Konsorciumi i gazësjellësit Trans Adriatik në Zvicër ka shpallur fituesit e tenderit për kompanitë që do të ndërtojnë tubacionet e gazit në Shqipëri dhe Greqi. Në total do të shtrohen 760 kilometra tuba me një diametër prej 1,2 metra.

Projekti është i ndarë në 5 lote. 215 kilometrat e tubacioneve që do të shtrohen në Shqipëri janë marrë përsipër nga kompania franceze SPIECAPAG. Hyrja në vendin tonë do të bëhet në Bilisht dhe do të përfundojë në Fier. E njëjta kompani do të ndërtojë 185 kilometra tubacion në Greqi si dhe do të bëjë lidhjen me gazsjellësin tjetër Tanap në Turqi. Ndërtues tjetër në Greqi do të jetë dhe një kompani italiane.

SPIECAPAG është një kompani gati shekullore dhe ka ndërtuar mbi 50 mijë kilometra tubacione gazsjellësash në të gjithë botën.
Ndërkohë, aktualisht në Shqipëri po punohet për ndërtimin e rrugëve ndihmuese përgjatë gjurmës ku kalon tubacioni, për të mundësuar transportin e makinerive dhe pajisjeve. Sipas parashikimeve sasitë e para të gazit do të lëvizin nga Azerbajxhani drejt Europes në vitin 2020.