Në prag të debatit të parë, sondazhet: Clinton me 6 pike para Trump

Vetëm pak ditë para debatit të parë që vë përballë Donald Trump dhe Hillary Clinton, kjo e fundit shënon një epërsi me 6 pikë ndaj miliarderit, të paktën kështu tregon sondazhi më i fundit kombëtar.

Ish-sekretarja e Shtetit kryeson me 45% ndaj 39% të atyre që mbështesin Trump. Rezultate të përafërta me këtë, tregojnë edhe sondazhe të tjera të zhvilluara kohët e fundit. Por sa i përket pyetjes se kush nga kandidatet duket më i sinqertë në retorikën e tij politike, 44% e votuesve mendojnë se Donald Trump flet më hapur sesa Clinton.

Ndërsa sa i përket problematikave më serioze në vend, votuesit shprehen me shumë besim tek ish-sekretarja e Shtetit, duke dhënë mendimin se Clinton ka platformë më premtuese për terrorizmin, hapjen e vendeve të punës, tregtisë dhe çështjes aq të debatuar të emigracionit. Por së fundmi, edhe Trump mori një lajm të mirë.

Ish-i nominuari republikan për kandidat për president, Ted Cruz, ka ofruar mbështetjen e tij në garën për Shtëpinë e Bardhë të nëntorit në SHBA. Senatori nga Teksasi, i cili luftoi ndaj Trumpit me të gjitha mënyrat për t’ia hequr atij mundësinë e shpalljes kandidat zyrtar i republikanëve, tashmë u shpreh pro miliarderit.

Cruz tha se do të përmbushte premtimin e tij për të votuar kandidatin republikan, sepse nëse zgjidhet demokratja Hillary Clinton do të ishte “tërësisht e papranueshme”.