Nea Ionia: material i ndezshëm i shpërndarë rreth kafenesë — hetimet drejt zjarrvënies së qëllimshme

Hetimet për zjarrin e madh që përfshiu një pallat banimi në Nea Ionia të Athinës, në orët e para të së hënës, 28 shtator, kanë sjellë një zhvillim të ri dhe të rëndësishëm. Sipas informacioneve të ERT-së, Drejtoria e Luftimit të Krimeve të Zjarrvënies ka gjetur sasi materiali të ndezshëm të shpërndarë në disa pika rreth kafenesë nga ku besohet se nisi flaka — një zbulim që, sipas të njëjtit burim, e drejton tashmë hetimin drejt pistës së zjarrvënies së qëllimshme.

Siç njofton ProtoThema, gjetja u bë gjatë kontrollit të thelluar që po bëhet në zonën përreth kafenesë në rrugën Kastamonis, ku flaka nisi rreth orës 04:25 të mëngjesit. Materiali i dyshimtë, i gjetur i shpërndarë në pika të ndryshme rreth lokalit, konsiderohet nga hetuesit një element kyç që përforcon dyshimet se zjarri nuk nisi aksidentalisht.

Kujtojmë se zjarri nisi rreth orës 04:25 të mëngjesit të së hënës në një kafene (shisha bar) në katin përdhe të pallatit dhe u përhap me shpejtësi në tre kate, duke mobilizuar 18 zjarrfikës që evakuan banorët. Nuk është hera e parë që ky lokal gjendet në qendër të një ngjarjeje të rëndë: në shkurt 2023, në të njëjtën kafene u regjistrua një episod me të shtëna, ku u plagos për vdekje një 37-vjeçar.

Hetimet vazhdojnë me intensitet, ndërsa autoritetet pritet të zbardhin mënyrën se si materiali i ndezshëm u shpërnda rreth lokalit dhe nëse ky zhvillim lidhet me episodet e mëparshme që kanë shënjuar këtë adresë.