Nënë Tereza mund të shenjtërohet vitin e ardhshëm
Nënë Tereza mund të shenjtërohet vitin e ardhshëm nga Papa Françesku, pasi Vatikani ka gjetur një person i cili është kuruar nga tumori në tru pas lutjeve të vazhdueshme për ndihmë nga ajo.
Një delegacion është dërguar në Brazil për të investiguar “mrekullinë” që mësohet të ketë ndodhur në Sao Paulo. “Daily Mail” shkruan se kanonizimi mund të bëhet tw dielwn e 4 shtatorit tw vitit 2016, në përvjetorin e 19 të vdekjes së saj.
Nënë Tereza është lumturuar nga Papa Gjon Pali II në vitin 2003 pasi menjëherë pas vdekjes së saj u gjet mrekullia e parë, ndërsa kjo e dyta mund edhe ta shenjtërojë.
Në fillim të këtij viti, Ati Elmiran Ferreira Santos iu ka thënë autoriteteve kishtare se një njeri është shëruar nga tumori në tru vetëm pas lutjeve të vazhdueshme të gruas së tij për ndërhyrjen e Nënë Terezës.
Tumori çuditërisht është zhdukur dhe personi i sëmurë është larguar nga kujdesi intensiv vetëm dy ditë më vonë. Mjekët besohet të jenë habitur nga shërimi i këtij personi, duke bërë që dy zyrtarë nga Vatikani të shkojnë dhe të interesohen me tepër për këtë rast.
Megjithatë, Vatikani zyrtar nuk ka pohuar dhe as mohuar nëse Nënë Tereza do të shenjtërohet vitin e ardhshëm.
Zëdhënësi i Selisë së Shenjtë, Reverend Frederico Lombardi ka thënë se është shumë shpejtë të jepet ndonjë përgjigje për këtë. Ai ka kujtuar se Papa Françesku duhet të aprovojë një mrekulli me ndërhyrjen e Nënë Terezës para se ajo të shenjtërohet.
