NFL, lojtari mysliman shënon dhe falet, por gjyqtari e ndëshkon

Një tjetër rast që e çon futbollin amerikan në qendër të polemikave, pas raportit mbi numrin e lartë të lojtarëve në aktivitet të përfshirë në vepra penale, më i larti se në çdo sport tjetër. Në skenë ka dalë tashmë diskriminimi fetar.

Husain Abdullah, lojtar i repartit mbrojtës të Kansas Siti Chiefs, ka shënuar mbrëmë në “touchdown”-in e dytë të karrierës së tij në NFL, ose siç njihet ndryshe futbolli amerikan (i ngjashëm me regbinë), pasi kishte marrë një pasim nga Tom Bredi në ndeshjen e fituar nga Chiefs kundër N.E.Patriots, 41-14.

Menjëherë më pas, për të festuar, Abdullah, që është mysliman, u ul në gjunjë dhe u fal pa e hequr kaskën mbrojtëse, duke u drejtuar drejt Mekës me kokën në tokë.

Për këtë është ndëshkuar nga gjyqtari për sjellje antisportive, gjë që i solli edhe një penalizim me 15 yards për Kansas Sitin në aksionin pasardhës.

Por tani, duke parë që ky vendim shkaktoi polemika mes tifozëve të NFL-së, në rrjetin social, zv.presidenti i komunikimit në ligë, Majkëll Sinjora, ka shkruar në “Twitter”: “Ishte një vendim i gabuar ai i gjyqtarit: Abdullah nuk duhej ndëshkuar”.

Dhe kjo, pavarësisht se në NFL-ka ka rregulla të ashpra sa i takon festimeve dhe golave. Për shembull është e ndaluar të festohet duke u shtrirë në tokë. Por sipas Sinjorës, bëjnë përjashtim gjestet fetare: “Abdullah nuk duhej të ishte ndëshkuar, sepse mes dispozitave të dhëna gjyqtarëve, ekziston fakti që nuk duhet penalizuar lojtari që ulet në tokë për motive fetare”.