Nga “i vdekur” në mes të turmës, Ahmadinexhad shfaqet papritur në funeralin e Khameneit

Ish-presidenti iranian, Mahmoud Ahmadinejad, është shfaqur publikisht në procesionin mortor të liderit suprem të vrarë të Iranit, Ali Khamenei, pavarësisht se në ditët e para të luftës disa media të lidhura me shtetin iranian raportuan se ai kishte humbur jetën pas një sulmi raketor pranë banesës së tij.

Ahmadinexhad u pa mes miliona qytetarëve të veshur me të zeza që morën pjesë në ceremoninë madhështore në Teheran, duke u shfaqur për herë të parë që nga fillimi i luftës. Për muaj me radhë nuk pati asnjë konfirmim apo përgënjeshtrim zyrtar mbi fatin e tij, çka kishte ushqyer spekulimet se ishte vrarë gjatë sulmeve izraelito-amerikane.

Rishfaqja e tij ndodhi një ditë pasi dy ish-presidentët e tjerë të gjallë të Iranit, Mohammad Khatami dhe Hassan Rouhani, munguan në ceremoni, ndërsa kritikët pretenduan se nuk ishin ftuar.

Funerali i Khameneit u kthye në një nga ceremonitë më të mëdha në historinë e Iranit. Autoritetet thanë se në Teheran u mblodhën deri në 20 milionë njerëz. Në procesion morën pjesë edhe presidenti Masoud Pezeshkian, ministri i Jashtëm Abbas Araghchi, kryetari i Parlamentit Mohammad Bagher Ghalibaf dhe drejtues të tjerë të lartë të regjimit.

Gjatë ceremonisë u panë pankarta me thirrje për hakmarrje dhe figura të presidentit amerikan Donald Trump, ndërsa turma brohoriste se rruga e Khameneit do të vazhdonte. Arkivoli i liderit suprem u transportua nëpër rrugët kryesore të Teheranit, mes një procesioni që zgjati rreth 12 orë, përpara se të nisej drejt qytetit të Mashhadit, ku do të varroset pas përfundimit të ceremonive zyrtare.