Ngjarjet në Beograd, Dade: Ministria e Jashtme të informojë Kuvendin

Kryetarja e komisionit të Jashtëm, Arta Dade tha sot se i ka kërkuar zyrtarisht Ministrisë së Jashtme që të informojë Kuvendin lidhur me hapat diplomatikë, pas ngjarjeve në ndeshjen Serbi-Shqipëri.
“Dje i kemi dërguar Ministrisë së Jashtme një shkresë zyrtare ku i kërkojmë të informojë komisionin e Jashtëm lidhur me hapat diplomatikë që ka hedhur, pas incidentit të ndodhur në Beograd, një ngjarje shumë e rëndë kjo që i tejkalon dhe përmasat e incidentit. Ne jemi në pritje të materialeve ose të paraqitjes së përfaqësuesve të Ministrisë së Jashtme. Kur t’i kemi në dispozicion do t’ju informojmë”, tha Dade në një prononcim për mediat.
Ne, vijoi ajo, e kemi vlerësuar pozitivisht atë që është bërë nga MPJ, notën verbale dhe kërkesën që i është paraqitur ambasadorit të Serbisë, përfshi dhe udhëzimet që MPJ, në linjë diplomatike, i ka kaluar tek ambasadat dhe prezencat tona diplomatike, jo vetëm në Europë, por dhe në botë”, përfundoi Dade prononcimin e saj.