Nikoliq i dhuron princit Charles librin serb për Kosovën

Presidenti i Serbisë Tomislav Nikoliq, i ka bërë gati dhuratat për princin britanik Charles kur ky i fundit të vizitojë Beogradin të mërkurën.

Siç njofton zyra e Nikoliqit, i pari i serbëve do i dhurojë princit nga Britania një libër për siç thuhet “trashëgiminë kristiane të Kosovës”.

Në nën titullin e kësaj monografie që është në gjuhën angleze, dhe do të jetë në duar të Charles shkruhet ”zemra historike dhe shpirtërore e popullit serb” duke iu referuar Kosovës.

Princi britanik Charles dhe dukesha e Cornwall-it, Camilla kanë nisur turneun ballkanik dy ditë më parë në Kroaci.

Çifti mbretëror do të qëndrojë sot dhe nesër në Serbi, ndërkaq, Malin e Zi do ta vizitojnë më 18 mars.

Vizitat e këtij turneu ballkanik ata do t’i përmbyllin në Kosovë, më 19 mars, transmeton Klan Kosova.

Përndryshe kjo do të jetë vizita e dytë e Princit të Uellsit në Kosovë, pasi ai vizitoi Kosovën në vitin 1999, ndërsa vizita e parë për Dukeshën e Cornwall-it.