Nis evakuimi i pasagjerëve të MV Hondius, Hantavirusi rikthen kujtimet e Covid-it në Tenerife

Operacioni i shumëdebatuar për zbarkimin e pasagjerëve nga anija turistike MV Hondius ka nisur këtë të diel në portin e Granadillës në Tenerife, ndërsa autoritetet spanjolle po përpiqen të menaxhojnë me masa të jashtëzakonshme shpërthimin e rrallë të hantavirusit që ka shkaktuar deri tani tre viktima në bord.

Ministria e Shëndetësisë e Spanjës konfirmoi se pasagjerët kanë filluar të evakuohen në mënyrë graduale, në një operacion riatdhesimi të koordinuar mes disa shteteve. Anija mbërriti në ishullin spanjoll me 147 persona në bord, ndërsa ekipet mjekësore dhe personeli ushtarak, të pajisur me kostume mbrojtëse biologjike dhe maska FFP2, kanë hyrë në anije për të kryer kontrolle dhe teste ndaj pasagjerëve dhe ekuipazhit.

Pasagjerët po transportohen me varka të vogla drejt bregut, ku më pas dërgohen me autobusë në aeroportin Tenerife Sur. Aty janë vendosur avionë çarter që do t’i riatdhesojnë sipas kombësisë në vendet e tyre të origjinës. Të parët që do të largohen janë 14 shtetas spanjollë, të ndjekur nga grupe pasagjerësh holandezë, gjermanë, grekë, britanikë, amerikanë dhe australianë.

Ministrja spanjolle e Shëndetësisë, Monica Garcia, deklaroi se operacioni po zhvillohet “normalisht” dhe se të gjithë personat në bord mbeten asimptomatikë. Megjithatë, autoritetet kanë vendosur masa të rrepta sigurie, duke krijuar një perimetër detar sigurie rreth anijes dhe duke mbajtur në gatishmëri dhjetëra specialistë të kujdesit intensiv në spitalin Candelaria në Tenerife.

Shpërthimi i hantavirusit ka rikthyer kujtime të forta të pandemisë Covid-19 në Ishujt Kanarie, ku gjatë ditëve të fundit janë zhvilluar protesta kundër ankorimit të anijes. Presidenti i Ishujve Kanarie, Fernando Clavijo, kishte kundërshtuar fillimisht hyrjen e anijes në port, duke paralajmëruar për rrezikun e përhapjes së virusit.

Edhe drejtori i përgjithshëm i World Health Organization, Tedros Adhanom Ghebreyesus, i cili ndodhet në Tenerife për të mbikëqyrur operacionin, u përpoq të qetësonte shqetësimet e banorëve lokalë. Ai pranoi se “dhimbja e vitit 2020 është ende reale”, por theksoi se rreziku për popullatën e gjerë mbetet i ulët për shkak të mënyrës së transmetimit të virusit dhe masave të forta të izolimit.

Hantavirusi, sipas OBSH-së, zakonisht transmetohet përmes kontaktit me urinën ose jashtëqitjet e brejtësve të infektuar. Rasti në bordin e “Hondius” lidhet me një zonë grumbullimi mbetjesh në jug të Argjentinës, e njohur mes vëzhguesve të zogjve. Edhe pse transmetimi nga njeriu te njeriu konsiderohet i rrallë, tre vdekje të regjistruara në bord kanë ngritur alarmin ndërkombëtar.

Më shumë se 100 ekipe mediatike nga e gjithë bota janë vendosur në portin e Granadillës për të ndjekur nga afër operacionin, i cili pritet të zgjasë dy ditë. Pas përfundimit të evakuimit, anija turistike do të vazhdojë udhëtimin drejt destinacionit të saj final në Holandë.