Nis përzgjedhja për Gjon Mili International Video Art Festival

Edicioni i katërt i Gjon Mili Video Art Festival ka hyrë në fazën e përzgjedhjes së artistëve, me temën “Are you dreaming?”. Si çdo vit, festivali do të zhvillohet në tre qytete: në Korçë më 13–15 qershor, në Dhërmi më 18–20 qershor dhe në New York më 27–29 qershor 2026.
Pas një numri të lartë aplikimesh nga artistë nga e gjithë bota, juria ka nisur shqyrtimin e projekteve që do të jenë pjesë e programit. Organizatorët bëjnë të ditur se konkurrenca këtë vit është e lartë dhe e fortë, pasi vetëm 40 vepra do të përzgjidhen për t’u shfaqur në netët finale. Çdo punë po vlerësohet me kujdes, duke marrë parasysh idenë, realizimin dhe mënyrën e instalimit përballë publikut.
Ndërkohë, festivali ka nisur të prezantojë disa nga pjesëmarrësit. “Dezo Hoffmann: Photographer of The Beatles” është një dokumentar me regji nga Laura Sivakova-Passova dhe Patrik Lancaric. Filmi rrëfen historinë e fotografit Dezo Hoffmann, i njohur për portretet e figurave të mëdha të shekullit XX, si Marilyn Monroe, Frank Sinatra dhe The Rolling Stones.

Artistja rumune Cătălina Gubandru merr pjesë me veprën “Expo Arbre Bușteni_Pine Forest”, një projekt që trajton natyrën përmes një gjuhe vizuale të ndjeshme dhe reflektuese.

Gjithashtu, festivali do të përfshijë edhe artistë të ftuar, të cilët do të prezantojnë veprat e tyre në kategorinë “Invited Artist”.
Shumë shpejt, në rrjetet sociale dhe në faqen zyrtare të festivalit do të publikohen artistët e përzgjedhur, si dhe programi i plotë, që tashmë është kthyer në një traditë të pasur të festivalit. Një festival jo vetëm eksperimental, por edhe një hapësirë reflektimi dhe përjetimi artistik.

Home