Tërmet 8-ballësh, 450 të vdekur në Nepal; kryeqyteti i rrënuar

Një tërmet i fuqishëm prej 7.9 ballë ka tronditur këtë të shtunë Nepalin, duke u marrë jetën rreth 450 personave, me bilancin që ka gjasa të rritet.

Epiqendra e tërmetit ka qenë në një zonë 77 kilometra në veri-perëndim të kryeqytetit Katmandu. Në zonën në fjalë, pallate të shumta janë rrafshuar duke zënë poshtë banorët, bëjnë të ditur mediat ndërkombëtare.

Një ministër nepalez ka deklaruar se dëmet janë masive, ndaj dhe ka kërkuar ndihmë nga agjencitë ndërkombëtare.

“Na duhet mbështetje nga agjencitë e ndryshme ndërkombëtare, që kanë aftësitë dhe pajisjet e duhura për t’u përballur me këtë lloj emergjence”, tha ministri i Informacionit, Minendra Rijal.

Tërmeti i fuqishëm shkatërroi edhe kullën Dharahara në Katmandu, ku banorët dolën nëpër rrugë, ndërsa të plagosurit u dërguan në spitalin kryesor. Rrjetet e telefonisë së lëvizshme kanë dalë nga funksioni.

Ndërkohë, lëkundjet sizmike janë ndjerë edhe në Nju Delhi dhe qytete të tjera në veri të Indisë, si dhe në Pakistan, ku janë regjistruar viktima, por ende nuk dihet me saktësi se sa.

Kryeministri indian Narendra Modi ka mbledhur ministrat e kabinetit të tij për të diskutuar mbi situatën, ndërsa ai pakistanez Nawaz Sharif ka bërë thirrje për ndihmë në mbështetje të autoriteteve nepaleze.