Një tjetër goditje për Blake Lively, biznesi i saj drejt mbylljes pas betejës me Baldoni

Aktorja e njohur Blake Lively po përballet me një tjetër zhvillim të pafavorshëm në biznes, pasi kompania e saj e pijeve, e njohur për markat “Betty Buzz” dhe “Betty Booze”, raportohet se po shkon drejt mbylljes graduale.

Sipas raportimeve të TMZ, biznesi i aktores po përjeton një periudhë të vështirë, në një kohë kur ajo ka kaluar një betejë të gjatë ligjore me aktorin dhe regjisorin Justin Baldoni.

Blake Lively lançoi markën “Betty Buzz” në vitin 2021, duke u fokusuar fillimisht te pijet freskuese dhe mikserët pa alkool. Dy vite më vonë, në vitin 2023, ajo zgjeroi aktivitetin duke prezantuar edhe “Betty Booze”, një linjë pijesh alkoolike të gatshme për konsum.

Megjithatë, disa zhvillime të fundit kanë ngritur pikëpyetje mbi të ardhmen e kompanisë. Sipas dokumenteve të markave tregtare të shqyrtuara nga TMZ, disa aplikime të lidhura me produktet e saj janë braktisur, përfshirë ato për pije me bazë birre dhe produkte të gazuara pa alkool.

Ndërkohë, aplikimet kryesore për emrat “Betty Buzz” dhe “Betty Booze” vijojnë të jenë aktive, ndaj nuk ka ende një konfirmim zyrtar se biznesi është mbyllur.

Një tjetër tregues i rënies së aktivitetit është edhe mungesa e postimeve në rrjetet sociale. Llogaria e “Betty Buzz” nuk ka publikuar asgjë që prej 5 prillit, ndërsa postimi i fundit i “Betty Booze” daton më 28 shtator.

Raportimet për vështirësitë e biznesit vijnë pas një periudhe të trazuar për Blake Lively, e cila u përfshi në një përplasje të bujshme ligjore me Justin Baldoni, bashkëprotagonistin dhe regjisorin e filmit “It Ends With Us”.

Polemikat që shoqëruan filmin dhe marrëdhënien mes dy aktorëve sollën vëmendje të madhe mediatike, ndërsa dokumente të bëra publike gjatë procesit zbuluan shqetësimet e disa partnerëve tregtarë për ndikimin e imazhit të aktores në shitjet e produkteve.

Sipas komunikimeve të publikuara në kuadër të çështjes, disa kompani dhe partnerë biznesi kishin shprehur rezerva për bashkëpunimet me markën e saj, duke monitoruar nga afër reagimin e konsumatorëve.