Norvegjia kundërshton tarifat e reja: Nuk pajtohemi me vlerësimin e autoriteteve amerikane

Norvegjia hodhi poshtë një vlerësim të SHBA-së se vendi nordik nuk ka arritur të parandalojë punën e detyruar. Kështu deklaroi ministri i jashtëm Espen Barth Eide duke shtuar se akuza ishte e pabazuar dhe nuk duhet të përdoret nga Presidenti Donald Trump për të justifikuar tarifat e reja.

Administrata Trump propozoi të martën tarifa deri në 12.5% ​​për importet nga 60 vende, përfshirë Norvegjinë, pasi përcaktoi se ato nuk kishin arritur të frenonin tregtinë e mallrave të prodhuara me punë të detyruar, një pohim që shumë partnerë tregtarë të SHBA-së e hodhën poshtë.

“Ne nuk pajtohemi fuqimisht me vlerësimin e autoriteteve amerikane se Norvegjia nuk po bën mjaftueshëm për të parandaluar punën e detyruar”, tha ministri në një deklaratë për Reuters.

“Norvegjia ishte ndër vendet e para që prezantoi legjislacionin për të parandaluar punën e detyruar në zinxhirët e furnizimit, përmes Aktit të Transparencës. Ne ua kemi komunikuar këtë qartë autoriteteve amerikane”, tha Barth Eide.

Kërcënimi i Trump për të vendosur tarifa të reja mbi partnerët tregtarë do të bëjë pak për të luftuar skllavërinë moderne – dhe madje mund t’i përkeqësojë gjërat, thanë ekspertë, grupe biznesi dhe disa grupe të të drejtave të njeriut.