“Odat e polifonisë”, rreth 80 të rinj në Gjirokastër interpretojnë folklorin dhe polifoninë

Vlerat e folkut, riteve, këngëve dhe valleve popullore të Qarkut të Gjirokastrës po transmetohen tek fëmijët dhe të rinjtë. Edicioni i 5-të i Festivalit Folklorik “Odat e polifonisë” ka mbledhur së bashku rreth 80 interpretues të rinj të folkut nga zonat e Gjirokastrës, Libohovës,Tepelenës dhe Dropullit. Artistët e rinj popullorë kanë prezantuar plot talent vlerat e folkut dhe etnografisë të zonave prej nga vijnë.

“Sot me këtë kostum unë kam përfaqësuar nusen gjirokastrite është kënaqësi dhe privilegj për mua të kem veshur këtë kostum kaq të bukur të qytetit të Gjirokastrës”, tha njëra nga artistet.

“Ne vijmë nga krahina e Lunxhërisë, ndihemi shumë të emocionuara dhe të kënaqura që do të tregojmë të gjitha traditat e Lunxhërisë, do të kërcejmë valle të kënduar dhe do të këndojmë këngë polifonike”, shtoi një tjetër vajzë.

Krahas dobishmërisë për përcjelljen e vlerave të folkut tek të rinjtë organizime tilla gjallërojnë sezonin turistik në Gjirokastër.

“Radhën sot e kishte që të martonim një vajzë gjirokastrite me kostumin e famshëm të Gjirokastrës dhe ajo që ndodhi në qendrën e pazarit ishte jashtëzakonsht shumë e bukur ku turistë, qytetarë e shijuan këtë performancë të jashtëzakonshme”, u shpreh Kudret Alikaj, regjisor.

Përgjatë këtij viti në skenën artistike në Gjirokastër janë organizuar evente dhe festivale të folkut për promovimin e vlerave të traditës dhe transmetimin e e tyre tek të rinjtë.