OSHEE publikon të dhënat: Humbjet në rrjet ranë në 28 përqind

Operatori i Sistemit të Shpërndarjes së Energjisë Elektrike ka publikuar të dhënat për 8-mujorin e këtij viti, që nga ulja e humbjeve në rrjet, arkëtimet, lidhjet dhe matësat e rinj e deri tek kontratat me klientët.
OSHEE thotë se treguesi i humbjeve ka pësuar një ulje të ndjeshme në 28.1 përqind për këtë periudhë të vitit. Operatori i Shpërndarjes ka mundur të grumbullojë nga arkëtimet për furnizimin me energji elektrike shumën prej 40,7 miliard lekësh prej të cilave 2,6 miliard lekë janë nga aktmarrëveshjet, ndërsa 38,1 miliard lekë nga faturat.
Gjatë këtij 8-mujori, thotë OSHEE,  janë kryer 21,342 lidhje të reja të energjisë elektrike ku kryesojnë me këtë tregues Tirana, Durrësi, Fieri dhe Shkodra.
Ndërkaq, rezulton të jenë instaluar në total një numër prej 51,283 matësash të energjisë elektrike ndërsa gjatë gjithë vitit të kaluar ishin instaluar 34,034 matësa.
Gjatë 8 muajve të këtij viti OSHEE thotë se janë nënshkruar 50,613 aktmarrëveshje të reja prej të cilave 46,238 i takojnë abonentëve familjarë ndërsa 4,375 të tilla me abonentët biznes. Totali i aktmarrëveshjeve  te lidhura  nga Dhjetori 2014 deri në Gusht 2016 ka arritur në 442,113.