Parlamenti Evropian miraton rezolutën mbi progresin e Shqipërisë drejt BE-së

Ministri për Evropën dhe Punët e Jashtme Ferit Hoxha ka njoftuar se Komisioni për Punët e Jashtme i Parlamentit Evropian ka miratuar me 58 vota pro tekstin e Rezolutës mbi Raportin e Progresit të Komisionit Evropian për Shqipërinë për vitin 2025.

Sipas tij ky zhvillim është i rëndësishëm dhe i mirëpritur dhe përbën një vlerësim të qartë për përparimin e qëndrueshëm dhe angazhimin e Shqipërisë në rrugën drejt anëtarësimit në Bashkimin Evropian.

Në një postim në në X, Hoxha thekson se rezoluta vlerëson ambicien e Shqipërisë për të përmbyllur negociatat deri në vitin 2027 dhe përforcon gjetjet e Raportit të Komisionit Evropian, duke ofruar një pasqyrë të plotë, objektive dhe të balancuar mbi ecurinë e procesit të integrimit, thellësinë e reformave të ndërmarra dhe përafrimin e politikës së jashtme me atë të BE-së dhe rendin ndërkombëtar të bazuar në rregulla.

“Shqipëria vlerësohet si një ndër vendet pararojë në procesin e zgjerimit. Theksohet përkushtimi i qëndrueshëm, konsensusi i gjerë politik për integrimin evropian dhe mbështetja e fortë e qytetarëve për këtë proces. Hapja e të gjithë grup-kapitujve dhe ecuria e rregullt e negociatave janë dëshmi e progresit të arritur”, shkruan ai.

Hoxha thekson se rezoluta njeh edhe kontributin e Shqipërisë për stabilitetin rajonal si dhe angazhimin në iniciativa të rëndësishme të BE-së, përfshirë Planin e Rritjes për Ballkanin Perëndimor ndërsa shton se Shqipëria mbetet e angazhuar për vijimin e reformave, adresimin e sfidave dhe ruajtjen e ritmit të progresit drejt qëllimit strategjik të anëtarësimit në Bashkimin Evropian.

Komisioni për Punët e Jashtme i Parlamentit Evropian, #AFET miratoi sot, me 58 vota pro, tekstin e Rezolutës mbi Raportin e #Progresit të Komisionit Evropian për Shqipërinë për vitin 2025.#Ministria për Evropën dhe Punët e Jashtme e mirëpret këtë zhvillim të rëndësishëm, i cili…