Patozi: Paraqitja e Ramës në Beograd, e paqortueshme. Opozita, jo detyrim t’i thotë ‘bravo’
Te paqortueshme e ka vleresuar paraqitjen e djeshme te kryeministrit Rama ne Beograd ish kreu i grupit parlamentar te PD-se, Astrit Patozi.
Ne nje postim ne profilin e tij ne FB, Patozi shkruan se megjithe nje mije rezervat qe ai ka per Ramen kryeminister, i vlereson paraqitjen e djeshme.
“Për Edi Ramën, si kryeministër dhe udhëheqës i Partisë Socialiste, kam një mijë e një rezerva. Te cilat i kam shprehur dhe do të vijoj t’i shpreh sa herë të më jepet mundësia. Ndërkohë, as që e pretendoj se ia njoh të gjitha gafat, dobësitë dhe skandalet, që e kanë shoqëruar atë në gjithë karrierën e vet të gjatë politike.
Por nëse do të më pyetnin për paraqitjen e tij dje në Beograd, do të thoja pa mëdyshje se, minimumi, ishte e paqortueshme. Kjo nuk e cliron aspak Edi Ramën nga përgjegjësitë për të tjerat dhe, as më bën mua më pak opozitar.
Kurse për fansat e tij politikë dhe mediatikë kam vetëm një fjali: Janë të lirë ta shprehin ekzaltimin e tyre, sipas meje të ekzagjeruar, por nuk kanë pse ia kërkojnë këtë edhe opozitës, e cila nuk ka asnjë detyrim dhe arsye t’i thotë “bravo” kryeministrit”- shkruan Patozi.
