PD bojkotoi rezolutën e Kuvendit, Berisha e shpall nga selia Iranin shtet terrorist

Kryetari i Partisë Demokratike, Sali Berisha, në një postim në Facebook, ka shpallur Gardën Revolucionare të Iranit si organizatë terroriste dhe qeverinë e Iranit si një regjim diktatorial. Berisha e cilësoi këtë si një deklaratë zyrtare të Partisë Demokratike të Shqipërisë.

“Partia Demokratike e Shqipërisë shpall Gardën Revolucionare të regjimit diktatorial të Teheranit si organizatë terroriste. Ajo e cilëson shtetin obskurantist të ajatollahëve si sponsorin kryesor të terrorizmit në botë dhe një kërcënim madhor për paqen dhe stabilitetin në Lindjen e Mesme dhe kudo në glob”.

Berisha gjithashtu dënoi sulmet e Teheranit ndaj vendeve të Gjirit Persik, të cilat i konsideroi vende mike të Shqipërisë. Ai po ashtu mbështeti përpjekjet e SHBA-së dhe Izraelit për atë që e cilësoi si “përmbysjen e diktaturës mizore teokratike të ajatollahëve”, duke favorizuar një qeveri të zgjedhur nga populli.

“Partia Demokratike e Shqipërisë dënon me forcën më të madhe sulmet e Teheranit ndaj vendeve të Gjirit Persik: Arabisë Saudite, Emirateve të Bashkuara Arabe, Katarit, Kuvajtit, Bahrejnit dhe vendeve të tjera mike të Shqipërisë, dhe u shpreh këtyre vendeve solidaritetin e saj të plotë.

Partia Demokratike mbështet përpjekjet e SHBA-së dhe Izraelit për përmbysjen e diktaturës mizore teokratike të ajatollahëve dhe zëvendësimin e këtij regjimi me një qeveri të zgjedhur nga populli, si një kontribut madhor për çlirimin e popullit iranian, si dhe për garantimin e paqes dhe stabilitetit në rajon e më gjerë”.