PD: Mbifaturimet bëjnë kërdinë në Lezhë, qytetarët s’ka kush i pret
Kryetari i Partisë Demokratike në Lezhë, Paulin Marku pa nga afër situatën e rënduar në sportelet e OSHEE-së, ku qytetarët shprehnin revoltë në lidhje me abuzimet që u bëhen prej kohësh faturave të tyre të energjisë.
Sipas një njoftimi për shtyp të PD, Marku konstatoi se, qytetarët ankohen se nuk gjejnë zgjidhje edhe pas ankesave të cilat i dorëzojnë zyrtarisht e madje ata denoncojnë edhe faktin se sahatet e tyre nuk vëzhgohen nga asnjë faturist, duke e drejtuar vëmendjen nga shteti, i cili sipas tyre po u vjedh hapur.
Kryetari i PD në Lezhë tha se, situata është dramatike dhe se këtu ka një korrupsion dhe vjedhje masive e gjithë qytetarëve të Lezhës.
“Unë vetë me sytë e mi e pash që qytetarët ankohen për mbifaturime deri në 897 kw një familje. Familjet e tjera kishin mbifaturime të përsëritura nga janari, shkurti dhe përsëri marsi. Desha të marr kontakt dhe me drejtuesin e degës së OSHEE, pavarësisht se është një njeri i emëruar politikisht nga Fieri dhe vjen t’u shërbejë qytetarëve në Lezhë. Besoj se këto emërime politike janë shkatërruese jo vetëm për Operatorin e Shpërndarjes por për të gjithë qytetarët e Lezhës, të cilët nuk kishte asnjeri t’i priste as tek Operatori i Shpërndarjes, as tek Kujdesi ndaj Klientit dhe as tek zyra e drejtorit. Qytetarët janë të irrituar sepse çdo ditë paguajnë mbifaturim të energjisë elektrike”, tha Marku.
