PD-Pollo: AMA autoritet jolegjitim, do ndjekim rrugën ligjore

Partia Demokratike, denoncoi si të paligjshëm emërimin e ish-drejtorit të Digitalb në krye të Autoritetit Mediatik Audioviziv, duke deklaruar se Gentian Sala, fshehu punësimin në Digitalb dhe se Partia Demokratike do të ndjekë rrugën ligjore.

Deputeti i Partisë Demokratike, Genc Pollo gjatë një deklarate për mediat sot, u shpreh se “ të enjten mazhoranca e përmbylli sagën e mundimshme një vjeçare të kapjes së Autoritetit të Medias Audiovizive për llogari të klient-padronit mediatik të tyre, duke shkelur me dy këmbët ligjin për përzgjedhjen e kryetarit të AMA-s, duke shkelur çdo rekomandim e këshillë të komunitetit ndërkombëtar”.

“ Partia Demokratike do të ndjeki rrugën ligjore dhe apelojmë publikun, operatorët mediatikë e më gjerë se kanë të bëjnë me një autoritet të paligjshëm ” tha Pollo.