PD tenton të bllokojë rrugën në Bradashesh

Një grup protestuesish të Partisë Demokratike tentuan sot të bllokojnë rrugën Tiranë-Elbasan, pranë fshatit të Bradasheshit.

Përpjekja për të bllokuar rrugën e protestuesve të udhëhequr nga ish-deputetët e Partisë Demokratike, Luçiano Boçi, Edmond Spaho dhe Endri Hasa erdhi si reagim për të penguar udhëtimin e kryeministrit Edi Rama drejt Elbasanit, ku po zhvillon një takim me banorët në kuadër të turit “Bashkia që Duam”.

Protestuesit u stacionuan në mes të rrugës duke sjellë bllokimin në trafik të automjeteve, jo vetëm makinave të vogla por edhe autobusëve me pasagjerë.

Forcat e policisë së Elbasanit, të mbështetura edhe nga Forcat e Ndërhyrjes së Shpejtë, mundën të shpërndajnë turmën e protestuesve duke hapur rrugën.

Megjithatë, gjatë gjithë kohës pati përpjekje për të dalë sërish në rrugë.