Përkeqësimi i këmbës së Veliajt, avokati Ndreca: Burgjet ende nuk kanë kthyer përgjigje për dokumentacionin mjekësor

Avokati Plarent Ndreca ka konstatuar sot në Institucionin e Ekzekutimit të Vendimeve Penale një përkeqësim të gjendjes së këmbës së Erion Veliajt, për të cilën, siç njofton Shqiptarja.com, nevojitet ndërhyrje mjekësore. Sipas avokatit, përkeqësimi është konfirmuar edhe nga stafi shëndetësor i IEVP-së gjatë verifikimit të kryer sot në ambientet e institucionit.

Ndreca i është drejtuar Drejtorisë së Përgjithshme të Burgjeve më 7 nëntor me një kërkesë për vënien në dispozicion të dokumentacionit mjekësor të klientit të tij, por kërkesa mbetet ende pa përgjigje. Avokati thotë se, pavarësisht kalimit të ditëve, institucioni nuk ka kthyer ende asnjë përgjigje për dokumentet e kërkuara.

Në letrën e datës 7 nëntor, ai ka kërkuar të gjithë kartelën mjekësore, rezultatet e ekzaminimeve, si dhe raportet e konsultave dhe trajtimeve të mëparshme lidhur me gjendjen e këmbës. Dokumentacioni, sipas kërkesës, duhet t’i përcillet ekipit mjekësor dhe mjekut që do të kryejë ndërhyrjen, në mënyrë që të përgatitet një plan i detajuar dhe i personalizuar për trajtimin.

Avokati kërkon, në bazë të legjislacionit në fuqi dhe të së drejtës për t’u informuar për shëndetin e klientit të tij, bashkëpunim të menjëhershëm dhe dorëzimin e dokumentacionit pa vonesë.

Sipas tij, situata nuk pret dhe duhet vepruar shpejt, në mënyrë që gjendja e këmbës të mos përkeqësohet më tej.